İranın Venesuelaya verdiyi SİHA-lar nümayiş etdirilib
Venesuelanın Müstəqillik Günündə keçirilən paradda İran istehsalı olan Mohajer-2/ANSU-100 Silahlı Pilotsuz Uçuş Aparatı (SİHA) nümayiş etdirilib.
SİHA-nın ən azı iki müxtəlif sursatla təchiz edildiyi müəyyən edilib.
Venesuela 2006-cı ildə İran istehsalı olan ilk PUA-ları texnologiya transferi ilə bərabər almışdı. Mohajer-2 tipli PUA-lar bu texnologiya transferinin nəticəsi olaraq ARPIA adı ilə Venesuelada istehsal edilib. Bəzi mənbələrə görə, Venesuela 12 Mohajer-2/ARPIA PUA almaq niyyətində idi, lakin yekun sayın daha çox olacağı təxmin edilir.
Mohajer-2 tipli PUA-lar daha sonra modifikasiya edilərək silahlandırılaraq SİHA-ya çevrildi. İlk növbədə, Mohajer-2 tipli PUA-lar katapult/raket mühərriki ilə havaya qalxan və paraşütlə yerə enən 50 km mənzilli taktiki kəşfiyyat vasitələri olub. Modernləşdirilmiş Mohajer-2-lər İran istehsalı olan Qaem-5 ilə təchiz edildi. Qaem-5-lərin də Venesuelada texnologiya transferi ilə istehsal edildiyi təxmin edilir.
Bundan əlavə, Venesuela keçən il Mohajer-2 PUA-larından əldə edilən ANSU-100 SİHA-nı nümayiş etdirib. Modernləşdirilmiş və silahlanmış yeni tip ARPIA artıq ANSU-100 adlanır.
2020-ci ildə İran Venesuela ilə Mohajer-6 tipli taktiki SİHA-ların birgə istehsalı və texnologiya transferi ilə bağlı layihə imzalayıb. Layihə çərçivəsində Mohajer-6 tipli SİHA-lar Venesuelanın EANSA şirkəti tərəfindən istehsal olunacaq. Mohajer-6 tipli SİHA-lar 4 Qaem-5 uzaqdan idarə olunan sursat daşıya bilir və 12 saata qədər havada qala bilir. Venesuelanın indiyədək Mohajer-6-nı alıb-almadığı bəlli deyil.
Qeyd edək ki, Venesuela hakimiyyətinin ABŞ-la problemlərinin yaranmasından sonra İran bu ölkə ilə münasibətlərini genişləndirərək Venesueladan ABŞ-a qarşı baza kimi istifadə etməyə başladı.
